《死亡筆記》MK版

睇完《死亡筆記》的戲，即刻走去睇漫畫，豪買十二本，三百幾蚊，少少蝕桌，追追追，一星期睇哂，又幾好睇喎！睇完，寫blog都後生廿年，喪似MK人！上一次有呢隻feel的，好似係小說《達文西密碼》啩；再上一次，肯定係村上春樹的《發條鳥年代記》和《挪威的森林》，再上一次？唔啦，點會記得呀，嗚嗚～～ >_<

《死亡筆記》係一本高智能漫畫，好用腦架，好似捉棋咁，夜神月諗L諗佢會點之後又點點點，諗諗諗諗諗，睇到頭都痛埋，好似自己攞黎笨七，但睇落心理加推理，其實都好high噃，每晚都睇到三點幾先訓，睇完剩係掛住諗劇情都訓唔著，慘慘。D公仔就少少頹啦，但L勁好笑囉，又有智慧，電影版的L都好似好有型呀，好攪！電影版果個夜神月女友係漫畫版冇的，劇情離左少少罩，但都好緊張，所以先至追番漫畫咋！

成本《死亡筆記》最搞鬼係死神，死神流克好似低低地，日日係度食蘋果，聽芝see菇bi話，蘋果係代表無知喎，所以死神咩都唔知，咩都唔想理，剩係識睥睥貢，俾死人夜神月利用左都唔知囉，死蠢！無知原來有時真係罪過，我睇完套漫畫就得出個教訓呀，真係發人深省呢！

最後好彩都係邪不能勝正，夜神月自己捉蟲，咁我個心先舒服D，但諗深一層，邊個先係正義，邊個先係邪惡呢？殺哂D罪犯唔係會令世界好D咩？但一路殺落去，好似連D犯碎料罪的人都殺，又唔係好對路喎，第日講大話都要殺，咪好(舌賴)嘢？況且，呢個所謂救世主奇拿都係人啫，第日唔知做咩忽上腦，發脾四，殺Q哂D唔like的人咪大狠鑊？都係咪制。

總之，好睇啦，講完！